السنكوح .......بالعامية المصرية

كفي اتشقق بدري
و نقشت بيه كحك العيد
ووهبني ابويا ف ليلة قدري
لكتاب الله
للعلم و أهله الأجاويد
اشتلت ف جنبي تقل التسميّة
رشّيتها على وش الصبح النادي
و حفظت اللوح الجاي
سمّعته قبل اللوح الماضي
قلبي..زغلول ..أخضر ..صوفي..
مفقوس قبلن ما يهل الحول
و ف دم خلاصه السخن
غسّلوه الغسل الشرعي
و سابوه شارد مبلول
يتلقّف مرقعة الشيخ
يسمع..و يرد القول
سمّوا اخواتي اولادهم باسمي
و اتباركوا بتمليسة جسمي
و بقيت ف العيلة " الديك ابو كشك "
أبو صوت دردوح
لكن لمّا ادنت ف وسط الناس
قالوا سنكوح..سنكوح
و اتاري دمي بيكاكي
ولانيش عارف ان انا مدبوح
سنكوح……

***********

عّلمني قعاد البرش..أوّطي
لاجل تخطّي عصاية سيدنا الشيخ
و عرفت أكش
ولا اهش الدّبان ..لو شال أو حط
أو نصّب على وشّي العش
أنده للساني ..ألاقيه في حزايا
أنده لقلبي..ألاقيه بينمّل في عضايا
أتعلق فيه و ابص لفوق
يتعلق شوقي ويايا
و احلم بالضلمة تبقى حمام
و قميصي الشتوي يبقى له اكمام
احلم..احلم بكلام
بالضهر اتغدى فيه و ارتاح
احلم بمعاد المرواح
لكن اتبعزق حلمي ف نومته
قام الشيخ و ف قومته
قال للناس قولوا معايا
كفر الواد ..قلب الواد الآيه
وجريت من خوفي ..أسابق خوفي
و الشمس ف وسطي حزام
قدحت..ردحت..و ساحت لاحلام
كش العصفور فوق عشه
ناش الفاش على وشه
اتحدفت فوق منه الحداية
قالت سنكوح
و أتاري دمي بيصوصو
ولانيش عارف ان أنا مدبوح
سنكوح
سنكوح
سنكوح.