مقاتيل فوق الركبة
مقاتيل ف الخوف و الربكة
مقاتيل ف الشيبة البدري العاضة ف دماغ الشبان
مقاتيل ف شناب مفروطة من وش الجدعان
مقاتيل ف الوردة اللي انتحرت
مقاتيل ف أدان الفجر الكاذب
مقاتيل ف الصوت الرايح جاي .. نادب
مقاتيل ف الكلمة الريفي الدايخة ف شوارع مصر
مقاتيل ف عمود النشر
مقاتيل ف الآه و اللأ
مقاتيل عايشين بالزق
يا بنت الايه
وحشتيني
و سيبتيني
ابات الليل مع العصافير
تواسيني
البعد ...... بالتغريد
القمر يرسم شفايف
تمد الدفا
و لحن جديد
يملا سكون البرد
اسهر انادي عليكي
تبصيلي
بضحكة جنان قتلتيني
وحشتيني....
يا بنت الايه
زمان الغربة وداكي بعيد كده ليه
بغني غنوة مجروحة ف جوف الناي
طب ازاي
أغمض عيني
تترسم أيامنا من تاني مع الموال
و ترحل مع القمرة
ليالي راحت
و أنا مش جاي
أضمد جرحى
لأ... بواسيه
لأني فيه
بحبك
يابنت الايه
وحشتيني
و سبتيني ابات الليل مع العصافير
تواسيني
