خطاوي الغريب ............بالعامية المصرية

على قد الغريب ماأشتال من الأحمال
و هربت خطوته ف خوفه
على الكلام ما أتقال و زاحم بالهموم جوفه
شفته ف صورته متبروز
ف نقرة قلبها أبيض
فحرها عسكري الطابية
و صياد البحور السبعة
و الفلاح…
ـ تقوله : بحرنا واسع
ـ يقول : أخواتي فاحرينه
ـ تقوله : عضمته زرقه
ـ يقولها :برضه فاهميته
ـ تقوله : الجو مش خالص
ـ يقول :ف جيبنا ضامنينه
تقوله و يقولها
و تفرفط حكايته حروف
كلام من غير يمين الربع و الحلفان
كلام أسيان
كلام أصدق من الملاحة لو تصدق
بتفرش قلبها الصافي
و تدي الناس ولا تاخد بنيّة ريحها متعافي
و تفرد كفها الدافي
و صدر ضلوعه مسكونة
ـ تقوله : الريح دا ماهوش وياك
دا ويانا
يرد صوته من جوهّ
يمرع ف سكون الشط
يفتت ضلمة النقعة
و يفرش ف الخلا رقعة
يقول الخوف و دافنينه ف جبن الأمس
ف شق الكف
ف الملاليح
و ف التلويح
لقرص الشـمـس